Article-Piller Rock

Piller rock

RM Zodinthara.
Hringnun hi a chang chuan buaina a khat, chhumdum chhahpui in a hual vel reng ang mai a ni thin. Nun thawveng leh zallen neih kan duha, chumi nei tur chuan hmalam pan in kan kal tauh tauh a. He hlimna kan zawnna kawng ah hian kawng ralti leh suar chhia a va han tam tak em. Hmalam pan ngam lovin kan awm fo a, tluk leh din fawmkemin hringnun hahchawlhna zawngin hma lam kan pan hram hram thin.

Nunkhaw nawmna, hahchawlhna leh hringnun famkimna chu sum leh pai ah awma kan hriat avangin chumi kawng chu kan zawh theuha. Hlimna tak tawng dawna kan inhriat laiin lungngaihna bak erawh kan hlawhchhuak si thinlo a nih hi. Chauvin kan tlu a lungngaiin kan rum fo thin. Hetiang hun ah hian kan mamawh tak kan hai fo a, pan tur dik pan lovin kawng dang kan zawh fo thin a nih hi. Hahchawlh kan mamawha thawklak kan mamawh tih pawh kan in hria, mahse engtia thawklaka engtia han chawlh tur nge tih erawh kan hre si thinlo a nih hi.

Piller Rock chu : Tuipui zawl a tanga teha ft 7400 laia sanga awm a ni a. Tah ngei chuan a nia kei chuan hringnun chawlhna leh hahdamna ka hmuhna chu ni. He hahchawlhna leh hahdamna ka chan hi eng lunghlu thami mah hian leizo hian ka ringlova, engnen mah thleng ka phal hek lovang.

Piller Rock chuanin : Chu Piller Rock mawina belchiang tur chuan zing ni chhuah hlimin ka thian pakhat nen chuan chu tlang lam pan chuan kan kal ta a. Enteh Siamtu hian tiang em em a thil mawi leh ropui hi hringfate tan hian kan hahdam nan a lo duang reng a lo nih hi a’ tih bak sawitur a vang khawp mai..
“And I must think, do all I can
That there was pleasure there
If this belief from heaven be sent
If such be natures holy plan
Have I not reason to lament,
What Man has made of man ?

A chhip atanga ni chhuak han mawizia mai chu(h) . Chumi hnuai lawk ah chuan Silver tha chi ang mai a var thianghlim leh nalh hian chhum chu a in phan var siau hlawma. Chutiang Vanrang chhum tia koh meuh pawhin a chim ve phakloh vanga intithei fe ni awm taka tlangpawng 2 lo ding va va te chu a va han mawi tak em ! A tlang chip han hawi chhoh chuan Pine(far thing) tree ding tlar sung chuan men a va han ti hahdam em, luite tui luangri ang maia an hnah han in chhem ri te chuan beng a va han ti tlai tak em..
A tlang kham chhenghchhe taka kara Chhawkhlei ni awm tak Parsen, lungawi hmel taka lo par te chuan mit a ti tlaia. A kham pang in chhawrdawh thla a phul hringdup mai te chuan mit men a va han ti nuam tak em!
He hmunah meuh hian chuan hringnun buaina leh manganna te chu theihnghilh luih ngai lovin vawmbo ang duakin a kiang nghala. Hei ngei hi a lo nih dawn hi Siamtun Hringfate chawlh hahdam nana a lo ruahman chu!. Sum leh pai tam tak senga sak in lianpui chhunga chawlh hahdam ai chuan he Siamtun mawi taka a duan Piller Rock chung a tanga khawvel thlir hi kei chuan ka duhsam a ni reng fo ang.

Ti hian ka ngaihtuah zuia : He Piller rock awmna hi South India, Tamil Nadu chhunga mi Kodaikanal a awm a ni a . He tlangram hi Mizoram nen pawh a inang khawp mai. A inanlohna ni a ka hriat chu he hmun hi chu uluk taka plan a nihna chauh hi ni in ka hria. Hei vang hian khawvel hmun tin atangin tourist tam takin an pan luih luih phah reng a ni.
Tui khawhthla, tlang thengthawnuam, hmun fianrial, ngaw tha leh boruak nuam te hi tourist ho pan chhan ber ni ah ka ngaia. A khaw mipui aimah hian hian tourist ho hi an tam zawk mahin a rinawm a ni. Heng tourist hovin an tlawh chhan thil zawng zawng hi he kan Zoram ah ngei hian a awm ve tho si a ti in ka ngaihtuah neuh neuh thin. Tourist a tanga an sum lakluh tam tur zia hi chhut tham tak a ni. Ka awta, kan ram pawh hetiang ang tho hi a ni si a ngatinge hetiang anga nalha kan sawngbawl ve mai loh ti in ka inzawt mai mai thin.
An ni chuan an tourist spot te an dah Natural thiam hle hian ka hre thin. A mi chengte an changkan vang ngawtin an tourist spot te an khawih danglam ve lova, chu chuan an tourist spot te pawh tlawh a ti nuam em em a ni. Kan Zoram mawi tak pawh hi engtikni ah emaw chuan mite tlawh huai huai khawpa mawia kan la siam hi ka ring tlata, chumi hunah chuan eizawnna tha lah sum tam tak kan ram leilung vang hian kan la hailuh ngei ka ring. Inkalpawhna tha kan neih a vanga inchimralna kan hlau rengte a nihloh chuan.